Spirulina

Spirulina er vel þekkt sem einhver næringarmesta fæða sem völ er á. Þetta er blá-grænþörungur sem þrífst í heitum, sólríkum löndum eins og Mið- og Suður Ameríku og Afríku og finnst einnig í basískum vötnum víða annars staðar. Algengustu tegundirnar sem notaðar eru í bætiefni eru Spirulina platensis og Spirulina maxima.

Spirulina inniheldur meira af æskilegum næringarefnum fyrir okkur en nokkur önnur þekkt planta, korn eða jurt. Um 60-70% þessa þörungs er prótín, sem er um 20 sinnum meira en er í sojabaunum. Í honum er einnig að finna fitusýrurnar GLA (gamma línólen), línólín og AA (arachidonic), vítamín B-12, járn, amínósýrur, RNA og DNA kjarnsýrur, beta-karóten og karótenóíð, chlorophyll og phytocyanin. Hið síðastnefnda er (litar)efni sem eingöngu hefur fundist í blágrænum þörungum og hefur verið notað við rannsóknir á músum með lifrarkrabbamein. Þeim sem var gefið þetta efni virtust eiga meiri möguleika á bata en þær sem ekki fengu efnið.

Spirulina er fæða sem hjálpar til við að vernda ónæmiskerfið, lækka kólesteról og taka upp steinefni. Spirulina er einkar æskileg þegar verið er að fasta, þar sem þetta bætiefni jafnar matarlystina og hefur hreinsandi áhrif á líkamann. Hún getur einnig hjálpað fólki með sykursýki, þar sem hið háa prótínmagn hennar jafnar blóðsykurinn. Hún hentar tvímælalaust fólki sem borðar lítið af grænmeti eða prótínum þó hún komi alls ekki í staðinn fyrir fæðu úr þessum flokkum.

Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.

Senda síðu Prenta síðu Senda á Facebook