Kalíum / e: Potassium

Kalíum er mikilvægt fyrir heilbrigt taugakerfi og reglulegan hjartslátt. Það er talið vinna gegn hjartaáföllum og hjálpa til við vöðvasamdrátt. Kalíum og natríum vinna saman að eðlilegu vökvajafnvægi í líkamanum. Kalíum er mikilvægt í efnahvörfum í frumum, hjálpar til við að viðhalda jöfnum blóðþrýstingi og flutning rafboða hjá frumum. Einnig stjórnar kalíum flutningi næringarefna í gegnum frumuhimnur. Sífellt fleiri rannsóknir benda til jákvæðra áhrifa kalíums og magnesíums gegn háþrýstingi og ýmis konar hjartasjúkdómum. Einnig leiddi rannsókn á fólki með síþreytu í ljós að neysla kalíums og magnesíums (1 g af hvoru á dag) dró úr einkennum þeirra.

Kalíum er helst að finna í grænmeti, sérstaklega grænu blaðgrænmeti, ávöxtum, fræjum, hnetum, kartöflum og korni. Bananar og avókadó eru einstaklega góð uppspretta af kalíum. Kaffi, tóbak, þvagræsilyf, sykur og áfengi eru gagnvirk kalíumi.

Skortur á kalíum er fremur óalgengur en kemur helst fram hjá fólki sem notar þvagræsandi lyf þar sem þau eyða kalíum úr líkamanum. Einkenni skorts lýsa sér sem bjúgur, blóðsykurskortur, háþrýstingur, þreyta, slen, vöðvaverkir, húðþurrkur, niðurgangur, harðlífi, skert starfsemi ósjálfráða taugakerfisins, taugaveiklun, þrálátur þorsti, hjartsláttaróregla, sykuróþol, svefnleysi, lágþrýstingur, og þrálátir höfuðverkir. Andleg og líkamleg streita eykur kalíumþörf líkamans.

Ráðlagðir dagsskammtar:

Ungbörn til 3 ára: 800 mg
Börn 3 til 6 ára: 1100 mg
Börn 7-10 ára: 2000 mg
Karlar frá 11 ára aldri: 3500 mg
Konur frá 11 ára aldri: 3100 mg
Konur á meðgöngu eða með barn á brjósti: 3100 mg

Upplýsingar þessar eru samansafn fróðleiks um náttúrulegar lækningar. Þeim er ekki ætlað að koma í stað tilmæla eða ráðgjafar fagfólks í heilbrigðisþjónustunni. Sjúklingar á lyfjum, einkum séu þeir haldnir alvarlegum sjúkdómum ættu að ráðfæra sig við lækni áður en þeir hefja neyslu bætiefna.

Senda síðu Prenta síðu Senda á Facebook